སྤྱིར་ཤེས་ཡོན་ཅན་གྱི་རྩོམ་པ་པོ་ནི་བསམ་བློ་བར་གྱུར་པའི་ཕུགས་བསམ་རིང་ལུགས་པ་རྣལ་མ་ཞིག་ཡིན་ལ། དེ་ནི་རྒྱལ་ཁབ་བམ་མི་རིགས་ངེས་ཅན་ཞིག་གི་ཆེས་མཐོའི་མགྲིན་ཚབ་པ་དང༌། ཡར་རྒྱས་མདུན་བསྐྱོད་ཀྱི་བསམ་བློའི་ཕྱོགས་སྟོན་འཁོར་ལོའང་རེད། འུ་ཅག་བོད་མི་རིགས་ལ་མཚོན་ན། ལོ་རྒྱུས་ཀྱི་བྱུང་རབས་ནང་གཞུང་དྲང་ལྷག་བསམ་དང་རིག་པའི་གཞུང་ལུགས་ཀྱི་བྱང་ཚད་མཐོ་བའི་ཕུལ་བྱུང་རྩོམ་པ་པོ་གང་མང་ཞིག་སྔ་རྗེས་སུ་ཕེབས་ཏེ་དུས་རིམ་སོ་སོའི་བོད་མིའི་སྤྱི་ཚོགས་ཀྱི་ཞབས་འདེགས་བསྒྲུབས་པར་མ་ཟད། རིན་ཐང་བྲལ་བའི་ལེགས་བཤད་ཀྱི་བརྩམས་ཆོས་འབོར་ཆེན་ཞིག་ཕྱི་རབས་པའི་ནོར་རྟེན་དུ་བཞག་ཡོད།

སྤྱིར་རླབས་ཆེན་གྱི་རྩོམ་པ་པོ་ཞིག་ཡིན་ན་མིའི་རིགས་ཀྱི་གླུ་བ་དང༌། མིའི་རིགས་ཀྱི་དཔའ་བོ། མིའི་རིགས་ཀྱི་མཛའ་བཤེས། མིའི་རིགས་ཀྱི་སྨན་པ་བཅས་ཡིན་པས། ཁོའི་སྨྱུ་གུ་ནི་དགའ་སྐྱོའི་འགྱུར་ཁུགས་མང་བའི་གླིང་བུ་ཞིག་དང་འདྲ་ལ། ཁོའི་རྩོམ་ཡིག་རྣམས་ནི་སྐྱོན་ནད་སེལ་བའི་སྨན་སྣ་རེ་ཡིན་ཞིང༌། ཁོའི་རྐང་རྗེས་རེ་རེ་ནི་གཟི་བརྗིད་དང་ཡིད་སྨོན་གྱི་མེ་ལོང་ཞིག་ཡིན་དགོས། དེས་ན་ང་ཚོའི་བོད་རིགས་རྩོམ་པ་པོ་རྣམས་ཀྱང་མ་མཐར་རང་མི་རིགས་ཀྱི་གླུ་བ་དང་སྨན་པ་སོགས་གང་རུང་ཞིག་ཡིན་དགོས།